0 Diſe mére mahte Meiſter gotfrit von ſtrazburg vn ſeit vo der minne
1 Ich bruefe in mime ſinne
2 Daz lu̍terliche minne
3 Der welte iſt worden ſu̍ wilde
4 Der umb ſo ſu̍llent bilde
5 Ritter und frowen
6 An diſen meren ſchowen
7 Wan es von ganzer liebe ſeit
8 Des bringet uns gewisheit
9 Von ſtrazburg meiſter gotfrit
10 Swer uf der waren minne trit
11 Wil oebene ſetzen ſinen fuos
12 Daz er banamen hoeren muos
13 Sagen unde ſingen
14 Von minnenclichen dingen
15 Und daz den were geſchehen
16 Daz ſu̍ ſich hetten under ſehen
17 Mit minnenclichen ougen
18 Die rede iſt ane lougen
19 Er minnet iemer deſte bas
20 Swer von minnen ettewas
21 Hoeret ſingen oder leſen
22 Dar umbe wil ich flizig weſen
23 Daz ich diſe schoene mere
24 Mit rede alſo bewere
25 Daz man dar an kieſen mu̍ge
26 Ein bilde daz der minnen tu̍ge
27 Die luter unde reine
28 Sol ſin vor allem meine
29 Ein ritter und ein frowe guot
30 Die hetten leben und muot
31 In einander verweben
32 Daz beide ir muot und ir leben
33 Ein ding waz worden alſe gar
34 Swaz der frowen arges war
35 Daz war ouch dem ritter
36 Da von ze jungeſt bitter
37 Wart ir ende leider
38 Die minne waz ir beider
39 Worden alſo gewaltig
40 Daz ſu̍ mannigvaltig
41 Mahten herze ſmerzen
42 Groz ſmerze wart ir herzen
43 Von der ſuezen minne kunt
44 Su̍ hette ſu̍ bitz an den grunt
45 Mit ir fu̍re enzu̍ndet
46 Und alſo gar durch grundet
47 Mit irre minnenclichen trutſchaft
48 Daz niemer moehte ſuliche kraft
49 Mit rede werden ze ende braht
50 In lu̍terlicher andaht
51 Niemand kunde volleſagen
52 Nie groezer tru̍we wart getragen
53 Von manne und ouch von wibe
54 Dan ouch ir beider libe
55 Su̍ zwei zeſamene trugen
56 Ouch kunde ſu̍ mit fuogen
57 Zuo einander komen niht
58 Daz ſu̍ zuo der minnen pfliht
59 Ir eigen willen moehtent han
60 Daz ſueze wip vil wol getan
61 Hette ein werden man zer e
62 Des wart irme herzen dicke we
63 Wan ir ſchoene was behuot
64 So vaſte daz der herre guot
65 Ni e moehte an ir geſtillen
66 Sins wunden herzen willen
67 Daz noch irre minne lag verſnitten
68 Des wart die not von ime gelitten
69 Die ſtrenge waz und engeslich
70 Nach irre minnen minnenclich
71 Begunde er alſo vaſte queln
72 Daz ſine pin verheln
73 Niht moehte vor ir lange
74 Zuo gienc er genge
75 Oder reit wanne es moehte ſin
76 Und taet do mitte ir clage ſchin
77 Sines herzen ungemach
78 Do von ze iungeſt ime geſchach
79 Ein leit daz in beſwerte
80 Und ſu̍ do nach bewaerte
81 Mit ſtarker huote ir beider
82 So lange bitz er leider
83 An irn geberden wart gewar
84 Daz ſu̍ die ſueze minne gar
85 Hette in irn ſtrig geworren
86 Daz ſu̍ mueſten dorren
87 Nach einander beide
88 Dar umbe wart ir vil leide
89 Dem guoten herren do
90 Er dahte wider ſich alſo
91 Enhuete ich mines wibes niht
92 Min ouge lihte an ir ſiht
93 Daz mich har nach geruwet
94 Wan ſu̍ mit ſchaden bruwet
95 Mit dieſem werden edeln man
96 Daſt war ob ich es gefuegen kan
97 Ich brings s uzer ſinre wer
98 Uber daz vil wilde mer
99 Wil ich zwar mit ir varn
100 Durch daz ich ku̍nne ſu̍ bewarn
101 Vor ime bitze daz er gar von ir
102 Gewenket ſines herzen gir
103 Ich horte ie ſagen deme
104 Daz dem ſiechen man beneme
105 Sin liep vil ſanfte wu̍rde leit
106 Der mir lange ſtetekeit
107 Von ime beſcheiden wu̍rde gar
108 Dar umbe wil ich mit ir dar
109 Zu dem fronen gottes grabe
110 Bitze daz ſu̍ gar vergezzen habe
111 Der hohen liebe die ſu̍ treit
112 Dem werden ritter vil gemeit
113 Alſus kam er u̍ber ein
114 Daz er den gelieben zwein
115 Ir trutſchaft wolte leiden
116 Die niemer doch geſcheiden
117 Moehten werden under in
118 Er kerte dar uf ſinen ſin
119 Daz er mit der frowen
120 Binaemen wolte ſchouen
121 Iheruſalem das reine lant
122 Unde do der ritter das bevant
125 Schiere des ze rate
126 Daz er nach ir trate
127 Wolt ouch varen u̍ber mer
128 In duhte des er ane wer
129 Do heime tot gelege
130 Ob er ſich des verwege
131 Daz er wendig wu̍rde
132 Der ſtrengen minnen bu̍rde
133 Twang ſo vaſte ſinen ſin
134 Daz er durch daz ſchoene wip
135 Were in den grimen tot gevarn
136 Der umbe er doch nut langer ſparn
137 Wolte noch ir ſine vart
138 Und do daz an ime inne wart
139 Die ſueze tu̍gende riche
140 Do befant in minnencliche
141 Daz vil keiſerliche wip
142 Frunt ſprach ſu̍ lieber lip
143 Min man iſt an den willen komen
144 Alſe du ſelber wol haſt benomen
145 Daz er mich wil floehen von dir
146 Nu volge trut geſelle mir
147 Durch dinre hohen ſelden art
148 Und erwende diſe vart
149 Die ſin lip hat uf geleit
150 Uber daz wilde mer vil breit
151 Var alleine dar u̍ber e
152 Dar umbe daz ich hie beſte
153 Wanne ſwenne er hat von dir vernommen
154 Daz du bist vor u̍ber komen
155 So blibet er alhie zehant
156 Under wirt der argwon erwant
157 Den ſin lip hat uffe mich
158 Wan er gedenket wider ſich
159 Were an diſen dingen iht
160 Der min herze ſich verſiht
161 An minem ſchoenen wibe guot
162 Der werde ritter hoch gemuot
163 Were niht von dem lande komen
164 Su̍s wart der zwifel ime benomen
165 Den wider mich ſin herze treit
166 Ouch ſol dir daz niht weſen leit
167 Obe du biſt eine wile dort
168 Bitze men verredet hie daz wort
169 Daz von uns fliget u̍ber lant
170 So dich her wider hat geſant
171 Der vil ſueze reine criſt
172 ſo heſtu u ſamit alle friſt
173 Dinen willen deſte bas
174 Obe men gar verredet das
175 Das man uf uns zuo mere ſaget
176 Dem edeln gotte ſi es geclaget
177 Daz du nach den willen din
178 Niht iemer maht bi mir geſin
179 Unde ich bi dir nach minre gir
180 Nu gant vil lieber herre her
181 Unde enphach von mir das vingerlin
182 Da bi ſolt u der ſwere min
183 Gedenken under ſtunden
184 Do mitte ich bin gebunden
185 So dich min ouge nu̍t anſiht
186 Wan zwar ſo mir iht geſchiht
187 Ich muos an dich gedenken
188 Din vart die kan mir ſenken
189 Iamer in mins herzen grunt
190 Gip mir her an minen munt
191 Ein fru̍ntlichen ſuezen kus
192 Unde tuo durch mich alſus
193 Alſe ich kan geſaget dir
194 Gerne frowe ſprach er zuo ir
195 Mit truebes herzen ſinne
196 Swaz ich der an gewinne
197 Ich tuon mit willen ſwaz ir went
198 Ich han ſo gar an u̍ch verſent
199 Herze muot und ouch den ſin
200 Daz ich u̍ch von rehte bin
201 Eigenliche underton
202 Lont mich u̍wern urlop enphon
203 Uzerwelte frowe guot
204 Und wiſſent daz min ſender muot
205 Nach u̍ch muos grozen kumber toln
206 Ich bin ſogar an u̍ch verquoln
207 Mit herzen unde mit libe
208 Liebeſte aller wibe
209 Daz ich daz michel angeſt habe
210 Men trage tot mich zuo grabe
211 E mir die ſelde me geſchehe
212 Daz ich dich iemer me geſehe
213 Hie mitte waz die rede hin
214 Des ſi do tribent under in
215 Von ir herzeleide
216 Die zwei gelieben beide
217 Schiedent ſich mit marter
218 Und twungent ſich do harter
219 Zuo Herzen an der ſtunde
220 Dan ich mit dem munde
221 Uch geſagen ku̍nne
222 An weltlicher wu̍nne
223 Lag ir beider herze tot
224 In liehten munde roſerot
225 Vil ſenfter minne pflagen
226 Darnach ſu̍ ſich bewagen
227 Aller froiden under in
228 Der werde ritter kerte hin
229 Mit iamer an daz mer zehant
230 Den erſten kiel den er do vant
231 Do wart er inne u̍berbraht
232 Er hette ſich des wol bedaht
233 Daz er uf der erden
234 Ny mere wolde werden
235 Froeidehaft noch rehte fro
236 Got geſcheffes danne alſo
237 Daz er zu̍ lande keme
238 Unde ettewas verneme
239 Von der lieben frowen ſin
240 Des wart ſin herzeclicher pin
241 Vil ſtrenge und ouch vil bitter
242 Der tugendhafte ritter
243 Begunde nach ir truren
244 Und in ſin herze muren
245 Vil iamerlichen ruwen
246 Sin alte ſorge nuwen
247 Nach ir ſuezen minne wart
248 Der reinen durteltuben art
249 Det er oeffenliche ſchin
250 Wan er nach dem leide ſin
251 Vermeit der gruenen froeiden zwi
252 Unde wonte ſtetecliche bi
253 Der du̍rren ſorgen aeſte
254 Er ſente ſich nach ir veſte
255 Unde wart ſin leit ſo rehte ſtark
256 Daz ime der jamer durch das mark
257 Trang bitz an der ſelen grunt
258 Er wart vil tiefer ſorgen wunt
259 Unde minnenclicher ſwere
260 Der ſende martelere
261 Sprach zuo maniger ſtunde
262 Mit ſu̍fzenden munde
263 Geeret ſi daz reine wip
264 Der lieben und der ſuezen lip
265 Mir git ſo herzecliche pin
266 Ia ſu̍ vil liebe frowe min
267 Wie kan ir ſueze meiſterſchaft
268 So bitterlicher noete kraft
269 Senden in min herzen
270 Wie mag ſo grozen ſmerzen
271 Ir vil ſelig lip gegeben
272 Sol ſu̍ troeſten nut min leben
273 So bin ich endeliche tot
274 In dirre herzeclage not
275 Was er mit jamer alle tage
276 Unde treip ſo lange diſe clage
277 Bitze er ze jungeſt wart geleit
278 In alſo groze ſendikeit
279 Daz er nùt langer moehte leben
280 Ime wart ſo grime not gegeben
281 Daz man wol an ime ſach
282 Daz touigenliche ungemach
283 Daz er an ſime herzen truog
284 Und do der werde ritter kluog
285 Der leiden mere ſich verſach
286 Das ime zuo ſterbende geſchach
287 Do ſprach er zuo dem knehte ſin
288 Vernim mich trut geſelle min
289 Ich bevinde leider wol
290 Daz ich ſicher ſterben ſol
291 Durch liebe minre frowen
292 Wan ſu̍ mich hat verhowen
293 Bitze uf den tot mit ſender clage
294 Dar umbe tuo daz ich dir ſage
295 Swen ich ſi verdorben
296 Und ich lige erſtorben
297 Durch daz keiſerliche wip
298 So heis mir ſniden uf den lip
299 Unde nim her us min herze gar
300 Bluotig und ruwe var
301 Daz ſolt u denne ſalben
302 Mit balſamen allenthalben
303 Durch daz es lange friſch beſte
304 Vernim was ich dir ſage me
305 Und frumme ein ledelin cleine
306 Von golde und von geſteine
307 Dar in min totes herze tuo
308 Und lege daz vingerlin dar zuo
309 Daz mir gap die frowe min
310 So die zwei zuo einander ſin
311 Beſloſſen unde verſigelt
312 So bring alſo verrigelt
313 Su̍ beide minre frowen
314 Durch daz ſu̍ mu̍ge ſchowen
315 Was ich von ir han erlitten
316 Unde min herze ſi verſnitten
317 Nach ir vil ſuezen minne
318 Su̍ hat ſo reine ſinne
319 Unde alſo ganze truwe
320 Daz ir min iamer nuwe
321 Leit ſa mir an ir herzen
322 Bevindet ſu̍ den ſmerzen
323 Den ich durch ſu̍ liden ſol
324 Dar umbe tuo ſo rehte wol
325 Unde erfu̍lle min gebot
326 Der reine un der ſueze got
327 Der kein edel herze nie
328 Mit der helfe ſin verlie
329 Der mueze ſich erbarmen
330 Uber mich vil armen
331 Unde mueze der vil lieben geben
332 Froiede und ein wunnencliches leben
333 Von ir muos ich hie ligen tot
334 Mit dirre clagenden herze not
334 Daz la dich herre got erbarmen
334 Und troeſte mine ſele vil armen
335 Der ritter nam ſin ende
336 Dar umbe ſine hende
337 Der kneht vil iemerliche want
338 Er hies in ſniden uf ze hant
339 Und er fu̍llet ime ſine bette
340 Swaz er in e gebetten hette
341 Daz tet er und kerte dan
342 Alſe ein froiedeloſer man
343 Mit dem herzen alſo tot
344 Er fuorte s alſe er ime gebot
345 Zuo der ſelbe veſte
346 Da er ſu̍ uffen wuſte
347 Durch die der liebe herre ſin
348 Leit des grimen todes pin
349 Do er zuo der veſten kam
350 Do du̍ frowe tugentſam
351 Waz inne bi der ſelben zit
352 Do reit ime uf den velde wit
353 Ir man engegen von geſchiht
354 Und wolte alſe uns die mere giht
355 Do lihte han gebeizſet
356 Des wart der kneht gereizſet
357 Uf clegeliches ungemach
358 Wan do der ritter in geſach
359 Do gedaht er alzehant
360 Zwar dirre iſt hat geſant
361 Umbe anders nu̍t wen umbe daz
362 Das er mere ettewas
363 Bringe minen wibe
364 Von ſines herren libe
365 Der nach irre minne jamer treit
366 Hie mitte er zuo dem knehte reit
367 Und wolte im mere fragen ſa
368 Do erſach er vil ſchiere da
369 Die lade von gezierden kluog
370 Do inne er daz herze truog
371 Unde der frowen vingerlin
372 Er hette ſu̍ an dem gu̍tel ſin
373 Gehenket beide von geſchiht
374 Als ob es were anders iht
375 Do das der ritter erſach
376 Den knappe gruoſt er und ſprach
377 Was er dar inne truege
378 Do ſprach der vil gefuege
379 Unde der getruwe ju̍ngeling
380 Herre es iſt einre hande ding
381 Daz verre mit mir iſt geſant
382 La ſehen ſprach er alzehant
383 Was dar inne ſi verborgen
384 Do ſprach der kneht mit ſorgen
385 Zwar des entuon ich niht
386 Kein menſche es niemer geſiht
387 Wan der es ſol von rehte ſehen
388 Nein alſus mag es nu̍t geſchehen
389 Sprach der ritter zuo ime
390 Wan ich es dir mit gewalte nime
391 Unde ſchowes under dinen dang
392 Dar nach waz vil hart unlang
393 Bitze daz er ime das ledelin
394 Brach von dem gu̍rtel ſin
395 Daz tet er uf do mit der hant
396 Er ſach das herze unde vant
397 Do bi der vrowen vingerlin
398 An den zwein wart ime ſchin
399 Daz der ritter lege tot
400 Unde diſe zwei ſinre not
401 Ein urku̍nde weren
402 Zuo der vil ſeldenberen
403 Der ritter ſprach dem knehte zuo
404 Ich ſage dir knappe waz du tuo
405 Var dine ſtraze welleſt du
406 Ich wil daz cleinoeter nu
407 Mir ſelber han daz ſage ich dir
408 Sus reit er heim nach ſinre gir
409 Unde ſprach zuo dem koche ſa
410 Daz er ime uz dem herzen da
411 Eine cleine ſunder trahte
412 Mit hohen flize mahte
413 Daz tet der koch mit willen gar
414 Er nam zuo ime daz herze clar
415 Und maht es alſo rehte wol
416 Daz man enbiſſen mer ſol
417 Dekeine ſlahte ſpiſe
418 Die ſo wol nach priſe
419 Mit edeln wurzen ſi gemaht
420 So daz herze vil geſlaht
421 Als es wart gar bereitet
422 Do wart nu̍t me gebeitet
423 Der wurt gienc ouch u̍ber tiſch
424 Unde hies tragen alſo friſch
425 Die trahte ſinen wipe dar
426 Frowe ſprach er ſueze gar
427 Dis iſt eine ſpiſe cleine
428 Die ſolt du eſſen eine
429 Wan du ir nu̍t geteilen maht
430 Sus nam die frowe vil geſlaht
431 Unde nam irs fru̍ndes herze gar
432 Alſo daz ſu̍ nu̍t wart gewar
433 Welher ſlahte es moehte ſin
434 Daz iemerliche trehtelin
435 Suezſe duht es werden munt
436 Daz ſu̍ do vor ze keinre ſtunt
437 Nie dekeine ſpiſe gas
438 Der geſmag ir ie geviele bas
439 Do die frowe ſtete
440 Daz herze geſſen hette
441 Do ſprach der herre alzehant
442 Frowe nu tuo mir bekant
443 Wie diſe trahte dir behage
444 Ich wene daz du dine tage
445 Enbiſſenſt keinre ſpiſen nie
446 Suezer frowe denne die
447 Lieber herre ſprach ſu̍ do
448 Niemer wurt ich rehte fro
449 Ob ich ie ſpiſe géſſe
450 Die ſo zu̍ckere méſſe
451 Mich duhte und alſo reine
452 So diſe trahte deine
453 Der iezunt han bekort
454 Aller ſpiſen ein u̍berhort
455 Muos ſu̍m ir binamen ſin
456 Sprechent lieber herr min
457 Iſt dis eſſen lobeſam
458 Geweſen wilde oder zam
459 Frowe ſprach er aber zuo ir
460 Vernim vil rehte was ich dir
461 Mit worten hie beſcheide
462 Zam und wilde beide
463 Waz diſe trahte ſa mir got
464 Den froieden wilde ane ſpot
465 Den ſorgen zam an under las
466 Du haſt des ritters herz gas
467 Daz er in ſime libe truog
468 Der nach dir hat erlitten genuog
469 Iamers alle ſine tage
470 Geloube mir was ich dir ſage
471 Er iſt von ſender herze not
472 Nach dinre ſuezen minnen tot
473 Unde hat dir das herze ſin
474 Und das guote vingerlin
475 Zuo eime urku̍nde her geſant
476 Mit ſime knehte in dis lant
477 Von dirre beiden mere
478 Wart die ſeldenbere
479 Alſe ein totes wip geſtalt
480 Ir wart in dem libe kalt
481 Daz herze daz geloubent mir
482 Ir liehten hende enphielent ir
483 Beide fu̍r ſich in die ſchos
484 Das bluot ir uz dem munde gos
485 Als es die ware ſchult gebot
486 Ia ſprach ſu̍ do mit grozer not
487 Han ich ſin herze denne gas
488 Der mir hat ane under las
489 Von grunde ie holden muot getragen
490 So wil ich u̍ch binamene ſagen
491 Daz ich nach dirre ſpiſen
492 So wol gemaht nach priſen
493 Niemer keinre trahten her
494 Mich fu̍rbas wil genieten mer
495 Got verbiete mir durch ſinen muot
496 Das nach ſo werder ſpiſe guot
497 In mich keine ſwache trahte ge
498 Enbiſſen ſol ich niemer me
499 De keinre ſlahte dinges
500 Wan des ungelinges
501 Der geheiſſen iſt der tot
502 Ich ſol mit ſender herze not
503 Verſwenden hie min armes leben
504 Umbe in der durch mich hat gegeben
505 Beide leben und lip
506 Ich were ein truweloſes wip
507 Ob ich gedahte nu̍t daran
508 Daz der tugenthafte man
509 Sante mir ſin herce tot
510 O we daz mir ie nach ſinre not
511 Wart ein tag das leben ſchin
512 Zwar es mag nu̍t lenger ſin
513 Daz ich eine án in lebe
514 Unde er in dem todo ſwebe
515 Der vor mir tru̍we nie verbarg
516 Sus wart ir not ſo rehte ſtarg
517 Daz ſu̍ von ſendem leide
518 ir blanken hende beide
519 Mit grime zuo einander vielt
520 Das herze ir in dem libe ſpielt
521 Von ſendem jamer nuwe
522 Hie mitte gap die getruwe
523 Ein ende irme ſuezen lebende
524 Und wider wag vil ebende
525 Mit eime ſweren lote
526 Swas er ir do vor genote
527 Ir fru̍nt geborget hette
528 Su̍ galt mit ganzer ſtete
529 Unde ouch mit hoher truwen ime
530 Got welle ſwaz ich dinges nime
531 Das ich wider gebe das
532 Mueze ſenfter unde bas
533 Hie hat diſe mere ein ende
534 Der riche got in ſchende
535 Daz er der ſpiſen ie gewuog
536 Die ſo iemerliche truog
537 So rehten getruwen wibe
539 Daz mich ruwet iemer
540 Unde ich vergiſſe es niemer
541 Sinre toerpeheite
542 Das er s ir ie geſeite.
0 Daz iſt daz hertz mëre
1 Jch preiſe in meins herertzen ſinne
2 Daz lawterleichen minne
3 Jn der werld iſt wilde
4 Hie an ſo manigem pilde
5 Ritter vnde frawen
6 Peÿ diſem mere ſchawen
7 Daz vn̈s von gantzer tugent ſait
8 Des pringet vn̈s di weiſhait
9 Von ſtrazpurg maiſter götfrit
10 Wer in gewert in meinen trit
11 Vnd weiſleich wil ſetzen ſein fuz
12 Wizzent daz er hören muz
13 Sagen vnd ſingen
14 Von minnichleichen dingen
15 Wem dw ſeld möcht geſchehen
16 Daz ez ſich möht ſehderen
17 Mit minikleichen augen
18 Dw red iſt ane lawgen
19 Der minnet etwaz deſter paz
20 Swer von minne etwaz
21 Höret ſingen oder leſen
22 Dar vmb ſo wil ich fleizigz weſen
23 Wie ich ditz gut mere
24 Mit red alſo pewere
25 Das man von nemen müg
26 Ain pild daz zu der minn tug
29 Ain ritter vnd ain fraw gut
30 die heten paide leben vnd mut
31 Jn ain ſo gar verbeben
32 Daz paidew leib vnd leben
33 Ain dink waz worden alſo gar
34 Waz der frawen arges war
35 Das warr auch dem ritter
36 Von ze jüngiſt pitter
37 Wart an in paiden laider
38 Dew minne waz ir paider
39 Worden ſo gar gewaltig
40 Vnd ſo manig valtig
41 Chom ſi in ir hertz
42 Da von grozzer ſmertz
42,1 Jn paden wart bechant
42,2 Als ich dw abentewr vant
43 Waz von der ſüzzen minne
44 Daz het in irs hertzen minne
45 Mit dem iren fewr erzündet
46 Vnd alſo gar durh gründet
47 Mit minnichleicher trawtſchaft
48 Daz nymmer möcht ir liebe kraft
49 Mit rede werden z ende pracht
50 Jr liepleichew andacht
51 Chünd niemant volſagen
52 Gentzer trew wart nie getragen
53 Von mann noch von weibe
54 Dann ſi zway an irem leibe
55 Paide zu ſamen trugen
56 Vnd ſi doch mit fugen
57 ſaZe men mochten chomen nicht
58 Dz ſi der gerenden minne phlicht
59 Mit anander nit mochten han
60 Dew ſchöne fraw wolgetan
61 Het ain werden man zer ee
62 Des wart irm hertzen we
63 Daz ſi ſo ſere waz pehut
64 Vnd der werde ritter gut
65 Nicht mocht an ir geſtillen
66 ſeins hertzen willen
67 Daz nach ir min wart verſinten
68 Des wart di not von in geliten
69 Dew ſtreng waz vnd ängſtleih
70 Nach ir lib minnichleich
71 Pegund er alſo ſer quelen
72 Dz er die pein nit moht vrhelen
73 Vor irem ee manne
74 Zu der frawen rait er vnd dannen
75 Vnd ye als dz mocht geſein
76 So tet er ir mit chlag ſchein
77 Seins hertzen vngemah
78 Da von ze jüngſt geſchah
79 Ain lait daz ſe peſwert
80 Der frawn man wart
81 Faſte hüten ir paider
82 Piz ez ze jüngſt laider
83 An ir geperd wart gewar
84 Daz ſich dw fraw gar
85 Het in iren ſtrik verworren
86 Daz ſi muſten dorren
87 Paide nach anander do
90 Der frawen man gedaht alſo
91 Enhüt ich meins weibs nicht
92 Mein aug leicht an ir geſicht
93 Ain dink dz mih gerewt
94 Vnd mir vil ſchanden prewt
95 Alſo gedacht der eleich man
96 Zwar ob ich s gefügen kan
97 Jch pring ſei auz ſeiner wer
98 Hin v̈ber daz wilde mer
99 So wil ich geren faren
100 Mit ir dz ich ſei pewaren
101 Müg vor im vnd für ſei hin
102 Wenn ich mich des an genim
103 So wirt dew lıeb geſchaıden
104 Vollikleich zwiſchen in paiden
105 Vnd vil leicht ain hertzenlait
106 Wenn lieb mit ſtetichait
107 Dew leng wirt geſpart
108 Nu wil ich faren diſe fart
109 Zu dem heiligen grab
110 Piz daz ſi vergezzen hab
111 Der hohen lieb die ſi trait
112 Gen den werden ritter gemait
113 Alſo chom er v̈ber ain
114 wie er den lıeben zwain
115 Jr frewntſchaft wolt laiden
116 Die doch nicht geſchaiden
117 Mocht werden vnder in
118 Dar auf ſatzt er ſein ſin
119 Wie er mit der frawen
120 Penamen möchte ſchawen
121 Jeruſalem daz gut lant
122 Do der ritter daz peuant
123 Der nach ir minne pran
124 Do wart der mut reich man
125 Vil ſchier des ze rat
126 Daz er pald vnd drat
127 Wolt faren v̈ber mer
128 Jn dawcht wie er an wer
129 Hie haim tot geleg
130 Ob er ſich des verweg
131 Daz er wendig würde
132 Der ſtrengen minnen pürde
133 Zwang ſo ſer ſein leib
134 Daz er durh dz rain weib
135 Wer in den grimmen tot gefaren
136 Er ſprach got müz mich pewaren
137 Jch wil nach ir an div fart
138 Do des div fraw innen wart
139 Dew ſelden tugentreiche
140 Peſant in tawgenleichen
141 Daz kayſerleiche weib
142 Sprach frewnt herr lieber leib
143 Mein man iſt in den willen komen
144 Als ir wol habt vernomen
145 Dz er mich wil füren von dir
146 Nu volg lieber herr mir
149 Div er vn̈s hat auf gelait
150 V̈ber daz wild mer prait
151 far du vor uns v̈ber
152 Daz er hie haim peſte
155 So peleibt er ſazehant
156 wirt auch ſein ſin verwant
157 Den er hat wider mich
158 Vnd gedenkt er wider ſich
159 Wer an diſem ding icht
160 Des mein hertz ſich verſicht
161 Gen meiner ſchon frawen gut
162 So wer der ritter hohgemut
163 Von dem land nymmer komen
164 Alſo wirt im der zweifel penomen
165 Da er ſein ſin hat auf gelait
166 Daz darf dir nicht weſen lait
166,1 Ob v̈nſer fart nit wendig wirt
166,2 Div fart vn̈s paiden fraẅd pirt
166,3 Peleib aber hie haim wir
166,4 So darf nicht laid weſen dir
167 Peleiſt du ain weil dort
168 Piz verredet wirt dz wort
169 Daz von v̈ns flewgt in daz lant
170 Als dich denn hat der wider geſant
171 V̈nſer herre jeſu chriſt
172 So haſt du mit mir all friſt
173 Deınen willen deſter paz
174 Als dew werlt verredet daz
175 Daz man ze mer von vns ſait
176 Dem reichen got ſei ez gechlait
179 Vnd ich nach mains hertzen gir
180 Nicht ymmer mag geſein pei dir
181 Nv nim von mir dz vingerlein
182 Da peÿ ſolt du der ſwere mein
183 Gedenken ze allen ſtunden
184 Damit ich gen gepunden
185 Als mich dein aug nicht an ſicht
186 Grozz trawren mir dain geſchiht
187 Mein trew iſt ane wenken
188 Dein fart chan mir ſchenken
189 Sorg in meins hertzen grunt
190 Nu pewt mir lieb dein munt
191 Mit ains frewnds ſüzzen kus
192 Vnd tu durh mein willen ſus
193 Als ich han geſaget dir
194 Gern fraw ſprach er zu ir
195 Auz trübs hertz ſinne
196 Waz ich dar an gewinne
197 So tun ich geren waz ir went
198 Jch pin ſo gar nach ew verſent
207 Mit hertzen vnd mit leibe
208 Fraw ſchöneſt aller weib
209 Daz ich michl angeſt hab
210 Man trag mich toten zu dem grab
211 E mir diw ſelde geſchehe
212 Daz ich dich ymmer mer geſehen
215 Mit jamer vnd mit laide
216 Die zway liebe payde
217 Zway hertz twungen en ain
218 Der ritter vnd dew fraw rain
218,1 Div lib ir hertz ſer durh ſnait
218,2 Mit trawren vnd mit hertzen
219 Zway hertz ſich ſchieden an der ſtunt
220 Mer dan ich m dem mund
221 Ew peſchaiden künne
222 An wirdichleicher wunne
223 So lag ir paider hertz tod
224 Jr liecht wengl roſen
225 Vil ſenfter chüſſe phlagen
226 Daz ſi ſich verwagen
227 Aller fraẅs vnder in
228 Der werd ritter ſchied da hin
229 An daz mer ze hant
230 den erſten kiel den er vant
231 Dar inne wart er v̈ber
232 Vil wol er ſich des pedacht
233 Daz er auf der erden
234 Nimmer wolte werden
235 enreich noch fro
236 Got fügte ez denn alſo
237 Daz er ze land keme
238 Vnd auch etwaz verneme
239 Von der lieben frawen ſein
240 Nach der ſein hertz ſenden pein
241 Waz ſtreng vnd darzu pitter
242 Der tugenthafte ritter
243 Pegund ſer ze trawren
244 Vnd ſein hertz mawren
245 Jn chlegleiche rew
246 Alte ſorg waz im new
259 Jn jemerleicher ſwere
260 Der ſend martrer
261 Ruft zu maniger ſtund
262 Auz ſaẅftendem munde
263 Ach geert ſei dz rain weib
264 Der leben vnd der ſüzzer leib
265 Mir tut ſo hertzenleichen pein
266 Ach ſi liebew fraw mein
267 Wie kan ſo gar mit maiſterſchaft
268 Des pitterleichen tods kraft
271 Mir ir rainer leib gegeben
272 Wil ſi nicht troſten mir dz leben
273 So ich muz ich ſchir ligen tod
274 Jn der chlag vnd in der not
275 So lag der ritter alle tag
276 Vnd traib ſo lang diſe chlag
281 Piz das man auzzen an im ſah
282 Den tawgenleichen vngemach
283 Den er an ſeinem hertzen trug
284 Da nu der werd ritter klug
284,1 Waz chömen v̈ber mer
284,2 Sein kraft waz an wer
284,3 Gentzleich von bechomen
284,4 Darnach het er vernomen
284,5 Daz ſeiner lieben frawen fart
284,6 Erwendet vnd vermiten wart
284,7 Von des herren wegen
284,8 Do nu der mer degen
285 Der laidigen mer ſich verſach
286 Da von ze ſterben im geſchach
287 Er ſprach zu dem knecht ſein
288 Nu höre trawt geſell mein
289 Jch verſich mich des wol
290 Daz ich penamen ſterben ſol
297 Durh daz vil raine weib
298 Nu haiz mir auf ſnieden den leib
299 Vnd nim dar auz mein hertz gar
300 Plutig vnd rewig gauar
301 Vnd haiz ez ſchön ſalben
302 Mit balſam allenthalben
303 Daz ez deſt lenger friſch peſte
304 Vernim waz ich dir ſage me
305 Früm ain ledlein clain
306 Von gold vnd von edelm geſtain
307 Darein mein tötz hterz tu
308 Vnd leg daz vingerlein dar
309 Daz mir gab diw fraw mein
310 Daz dw zwaÿ peÿ anander ſein
311 Verſlozzen vnd vnd verſigelt
312 Pring ez alſo verrigelt
313 Meiner lieben frawen
314 Daz ſi dar an müg ſchawen
315 Waz ich durh ſei hab erliten
316 Wie mir mein hertz ſei verſniten
317 Nach ir vil edeln minne
318 Si hat ſo raine ſinne
319 Vnd ſo gantz trew
320 Daz ir mein jamer new
321 Ÿmmer get ze hertzen
322 Erforſchet ſi den ſmertzen
323 Den ich durh ſei leiden ſol
324 Dar vmb ſo tu recht wol
325 Vnd erfüll mein gepot
326 Der rain vnd der ſüzze got
327 Der chain edel hertz nie
328 Mit ſeiner hilfe gelie
329 Der müz ſich erparmen
330 V̈ber mich vil vil armen
333 In der chlag vnd in der not
334 So lag der edel ritter tot
335 Vnd nam alſo ſein ende
336 Dar vmb ſeine hende
337 ſein kneht want vnd waint
338 Den herren er auf ſnait
340 Vnd nam auz im ſein hertz gar
340,1 Plutig vnd rewig geuar
340,2 Er hiez ez ſchon ſalben
340,3 Mit balſam allenthalben
341 Do daz geſchach er ſchied von dan
342 Alſo ain trawriger man
343 Mit dem hertzen alſo tot
344 Daz furt er als im ſein herr gepot
345 Zu der ſelben veſte
346 Da er auf weſte
351 Dẇ frawen peÿ der ſelben zeit
352 Nu bechom im auf dem veld weit
353 Der frawen wirt von geſchicht
354 Der wolt als vn̈s daz puch giht
355 Vil leicht han gepaizzet
356 Dez wart der knecht geraitzet
357 Auf tëgleichen vngemach
358 Der herr zu dem knecht ſprach
367 Er fragt in wannen er rite ſa
368 Do ſah er im an der ſeiten da
369 Ain lëdlein dz waz klug
370 Da er daz hertz inne trug
371 Vnd ſeiner frawen vingerlein
372 An den zwain wart im ſchein
373 Wie der ritter wër tod
374 Vnd dw zwaÿ ſeiner not
374,1 Ain vrchünde wëre
374,2 Zu der vil ſelden
375 Do daz der ritter erſach
376 Den knaben gruzt er vnd ſprach
377 Waz treſt du hie verporgen
378 Der knecht ſprach mit ſorgen
379 Als ain tugentleicher jungelink
380 Herr es iſt ain haimleich dink
381 Daz verr iſt peÿ mir geſant
382 La ſehen ſprah er ze hant
385 Er ſprah herr des tun ich nicht
386 Chain aug ez nÿmmer an ſicht
387 Wan der ez ze recht ſol ſehen
388 Des kan doch nicht geſchehen
389 Sprach der ritter wider in
390 Wan ich dir s m gewalt nim
391 Vnd ſchaw ez vnder dein dank
392 Dar nach waz nicht lank
393 Daz er im daz ledlein
394 Geprach von der ſeiten ſein
395 Vnd tet ez auf mit ſeiner hant
396 Da er dz hertz inne vant
397 Vnd ſeiner frawen vingerlein
398 An den zwain wart im ſchein
399 Wie der ritter wer tod
400 Vnd dw zwaÿ ſeiner not
401 Ain vrchünde wëre
402 Zu der vil ſelden
403 Der ritter ſprach dem knecht zu
405 Reit von hinnen welleſt du
405,1 Friſten fuz vnd hant
405,2 Ez iſt ſicher vnerwant
407 Daz claïnod wil ich haben mir
408 Haim rait er nach ſeins hertzen gir
409 Er ſprach zu dem choche da
410 Daz er aus dem hertzen ſa
411 Ain raine peſunder trachte
412 Mit gutem fleizze machte
412,1 Du ſolt auch merken da peÿ
412,2 Waz ſpeÿſe hie in der chuchen ſeÿ
412,3 Dẇ ſol verſaltzen werden
412,4 Daz ir auf der erden
412,5 Nieman müg geniezzen
412,6 Des la dich nicht verdriezzen
413 Daz tet der koch m willen gar
414 Er nam daz tot hertz dar
415 Er macht ez alz rechte wol
416 Daz man penamen ſol
417 Enpeizzen nÿmmer kainer ſpeiſe
418 Dẇ als wol nach preiſe
419 Mit guten wurtzen ſei gemacht
420 Als dz tot hertz geſlacht
420,1 Do dẇ zeit chomen waz
420,2 daz der herr ze tiſch ſaz
420,3 der koch het nicht vergezzen
420,4 verſaltzen waz daz ezzen
420,5 daz man es wider dannen trug
420,6 dar vmb wart er geſcholten genug
423 Ze jüngſt trug man ze tiſch
424 Daz tot hertz friſche
425 Der herr pot ez der frawen dar
426 Fraw ir ſult nu gar
427 Diſe trachte chlaine
428 Ezzen alterſaine
429 Wan du ir nicht getailen macht
430 Dẇ edel fraw geſlacht
431 Az daz tot hertz gar
432 Daz ſi nie wart gewar
433 Welher hand ez mocht geſein
434 Daz jemerleich ſpeiſelein
440 Do des der ritter wart gewar
441 Er ſprach zu der frawn dar
445 Wa azzt ir chain ſpeiſe ÿe
446 Dw ſüzzer wer dann die
447 Dẇ fraw die ſprach do
448 So müz ich y̋mmer weſen fro
449 Ob ich yë ſpeiſe ge ezze
450 Dẇ mich ſo zukker mezze
451 Daẅcht vnd alſo rain
452 Als diſe trachte chlain
453 Nu ſagent mir durh got
454 Dẇ warhait ſunder ſpot
457 Jſt diſe ſpeiſe lobeſam
458 Geweſen wild oder zam
459 Er ſprach fraw gelawb mir
460 Der ritter dnr mit dinſt dir
465 Waz ÿe perait an vnderlaz
466 Des ſelben hertz haſt du gaz
467 Daz er in ſeinem leib trug
468 Er het durh dich geliten genug
469 Jamers all ſeine tage
470 Vernim recht waz ich dir ſage
471 Er iſt von ſendes hertzen not
472 Durh dein edlew minne tot
477 Von dem laidigen mere
478 Wart dew ſelden
479 Als ain tot weib geſtalt
480 Jr wart in dem leib kalt
481 Daz hertz dz gelawbt mir
482 Jr planken hend enphielen ir
483 Paide nider in die ſchoz
484 Daz plut ir zu mund vnd ze naſ auz doz
485 Als ir dẇ ware ſchulde gepot
486 Awe ſprah ſi auz not
487 Han ich meins frewnds hertz gaz
488 Der mir an allen vnderlaz
489 Je holden mut hat getragen
490 Jch wil dz ſicherleichen ſagen
491 Daz ich kaine ſpeiſe
492 Jn kainer ſlachte weiſe
493 Mich nÿmmer wil genieten
494 Got müz mir gepieten
495 Durch ſein tugentleichen mut
496 Daz nach ſo werder ſpeiſe gut
497 Swacher ezzen in mich icht ge
498 Jch enpeizz nÿmmer me
499 Chainer hande dings
500 Wan des vngelings
501 Daz gehaizzen iſt der tot
510 Owe daz mir nach ſeiner not
511 Je tag wart dz leben ſchein
512 Ez mag auch nicht geſein
513 Daz ich hie allain leb
514 Vnd er dort in dem tod ſtreb
519 Jr hend ſi ze ſamen vielt
520 Daz hertz ir in dem leib ſpielt
521 Jn ſender jamerung
522 Dẇ zarte fraw jung
523 Ain end gab irem rain leben
524 Si wider wag vil eben
525 Mit ainem ſweren gelöt
526 Daz ſi da vor genöt
527 Jrem frewnd gepürget hat
528 Mit vil jemerleicher tat
529 So vergalt ſi im
530 Got geb wz ich geporg oder genim
531 Das ich ez allz gelte paz
532 Dann dew fraw tet daz
533 Alſo nam ſi ir ende
534 Daz got den ritter ſchende
535 Daz er der ſpeiſe ÿe gewug
536 Da von ir hertz jamer trug
537 Am an ain getrewn weib
538 Dew red alſo beleib
543 Ditz gut mer hat ain end
544 So got den ritter ſchend: